Algorta jaietan Eskubeltzen txupinazoarekin

Ikasturtea amaitu da, udalekuak ere atzean utzi ditugu eta, pixkanaka, udako erritmo lasaiagoan murgilduta gaude. Hala ere, Eskubeltzen 35. urteurrenak ez du etenik, eta urte osoan zehar ospakizunez, topaketez eta elkarrekin bizitako une bereziez betetako bidea egiten jarraitzen dugu. Izan ere, gure urteurrena ez da iragana gogoratzea soilik; gaur egun ere taldearen parte diren pertsona guztiak elkartzea eta auzoarekin dugun lotura ospatzea da.

Aurten, ospakizun berezi horren barruan, Algortako Jaietako Txupinazoan parte hartzeko aukera izan dugu. San Nikolas plazan elkartu ginen eskubeltztar ugari, gure pañoleta eta taldeko kamiseta korporatiboa soinean, herriko jaietako hasiera ofiziala elkarrekin bizitzeko.

Urtero bezala, aurreko urteko kuadrilla irabazleak pregoia irakurri eta txupinazoa jaurti ostean, Algortako kaleak kolorez, musikaz eta jai-giroz bete ziren. Une berezi hori gertutik bizitzea ilusio handiz hartu genuen, are gehiago gure 35. urteurrena ospatzen ari garen honetan.

Eskubeltzentzat, herriko ekitaldi hauetan parte hartzea askoz gehiago da jaietan egotea baino. Gure taldearen balioetako bat auzoan eta herrian errotuta egotea da, eta horregatik, aurten ere, gure “Auzoan Errotuta” leloa presente egon da jaietako hasieran. Hamarkadetan zehar ehunka haur, gazte, familia eta begiralek osatutako komunitatea gara, eta horrelako uneek erakusten dute Eskubeltz Algortaren parte dela eta Algorta ere Eskubeltzen historiaren parte dela.

Udalekuen ondoren berriro elkar ikusteko aitzakia ezin hobea izan zen, eta urteurrenak eskaintzen dizkigun momentu berezi horietako beste bat gehitu genuen gure oroitzapenen bildumara.